Як была я ў бацюшкі Ядна доч у нарядзе. Ой, горя мне, горя, ой, горя дзяве. Ядна доч у нарядзе Да як вішанька у садзе. Ой, як вішанька у садзе Да як рожа ў вагародзе. Зарякалісь ацец, маці Дай за пісаря й аддаці. Пісарь лістанькі піша, Жыватом(ы) не прадыша. Зарякалісь ацец, маці За паповіча й аддаці. А паповіч, праскур еўшы, Па абедах валачыўся, Па абедах валачыўся, Дай праскуркай удавіўся. Зарякалісь ацец, маці Дай за пахаря й аддаці. Ой, радасць мне, радасць, ой, радасць дзяве. Пахарь полячка паша, У ладонячкі пляша. Ён за пужачку бярэцца, Ён песянак напяецца.